Jaamacadda Boosaaso – Garoowe iyo Hay’adda Cilmi-baarista iyo Horumarinta Bariga Afrika (DAD) oo Kala Saxiixday Heshiis Iskaashi

Maamulka Jaamacadda Boosaaso – Garoowe (UOBG) ayaa si diirran u soo dhaweeyey Prof. Dr. Ali Sheikh Ahmed, Agaasimaha Guud ee Hay’adda Cilmi-baarista iyo Horumarinta Bariga Afrika (East Africa Association for Research and Development – DAD), oo uu wehelinayey Mudane Anas Ali Daahir, Agaasimaha Fulinta ee hay’adda. Intii uu socday booqashada, wafdiga waxaa lagu soo wareejiyey xarumaha kala duwan ee Jaamacadda, halkaas oo ay ku soo arkeen horumarka ay Jaamacaddu ka samaysay dhinacyada waxbarashada, cilmi-baarista, adeegyada tacliinta, iyo ka qaybqaadashada horumarinta bulshada. Booqashadu waxay sidoo kale fursad u ahayd in la soo bandhigo dadaallada Jaamacaddu ku bixiso tayeynta waxbarashada sare iyo kobcinta cilmi-baarista. Gunaanadka booqashada waxaa lagu kala saxiixday Heshiis Is-afgarad (Memorandum of Understanding – MoU) oo u dhexeeya Jaamacadda Boosaaso – Garoowe iyo Hay’adda Cilmi-baarista iyo Horumarinta Bariga Afrika (DAD). Heshiiskan ayaa saldhig u noqonaya iskaashi rasmi ah oo lagu xoojinayo cilmi-baarista, horumarinta tacliinta, kobcinta awoodda aqooneed, hal-abuurka, iyo hirgelinta barnaamijyo waxbarasho oo ay labada dhinac dan wadaag ka yihiin. Iskaashigan wuxuu ka tarjumayaa sida ay Jaamacaddu uga go’an tahay dhisidda xiriirro istiraatiiji ah oo kor u qaadaya tayada waxbarashada, cilmi-baarista, iyo adeegga bulshada, isla markaana fursado cusub u abuuraya ardayda, macallimiinta, iyo cilmi-baarayaasha. Jaamacadda Boosaaso – Garoowe waxay sii xoojinaysaa dadaalladeeda ku aaddan horumarinta aqoonta, cilmi-baarista, iyo dhismaha bulsho aqoon iyo horumar ku dhisan. #BuildingBetterCommunity